Mu gihe abaturage b’imwe mu Mirenge igize Akarere ka Bugesera iri muri Guma mu rugo bitewe n’ubwandu bwa Covid 19 buri hejuru bwayigaragayemo, Umurenge wa Rilima uriguha ibiribwa imwe mu miryango yagizweho ingaruka n’iyo Guma mu rugo abaturage bakaba bishimiye ifunguro bahawe n’ubuyobozi.
Murwanashyaka Oscal ni Umunyamabanga nshingwabikorwa w’Umurenge wa Rilima, avuga ko kimwe n’indi mirenge uko ari itanu yashyizwe muri Guma mu rugo mu Bugesera, Ubuyobozi bw’Umurenge wa Rilima bafatanyije n’abakorerabushake n’inzego zishinzwe umutekano bakoze ubukangurambaga bwinshi mu baturage kugira ngo ubwandu bwari bwagaragaye muri imwe mu midugudu byatumye bashyirwa muri Guma mu rugo bukumirwe burundu.
Agira ati “Twatangiye gutanga ibiryo ku miryango itishoboye yagizweho ingaruka zikomeye n’ino Guma mu rugo yabaye tukizera tudashidikanya ko bitewe n’uko ubwandu bwagabanutse ugereranyije na mbere mu minsi mike tuzayikurwamo maze abaryaga babanje kujya gukoresha imbaraga zabo nk’abanyonzi, abafundi, abayedi, abacuruza ubuconco na za butike babashe gusubukura ibikorwa byabo bibinjiriza bikanabatunga buri munsi.
Avuga ko n’ubwo abaturage bahawe ibiribwa atari imiryango yose kuko mu ngo 6500 zibarurwa mu murenge wose zikaba zibumbiyemo abaturage 29,000 abagomba kugerwaho n’ibiribwa ari ingo 1,038 zigizwe n’abantu 4,469 byumvikanye ko ari ngombwa ko Guma mu rugo yarangira kugira ngo abantu bakomeze kwirinda kwandura Covid ariko banakora ibikorwa bibaha ifunguro rya buri munsi hadategerejwe imfashanyo nayo itabasha kugera kuri bose.
Bwana Murwanashyaka avuga ko mu gukangurira abaturage b’Umurenge ayoboye kuguma mu rugo mu minsi 14 bashyiriweho, hongerewe imbaraga mu kubakangurira gukomeza kwirinda hifashishijwe imodoka ifite ibyuma birangurura amajwi yazengurukaga imidugudu yose ikangurira abantu kutava mu ngo zabo no gukomeza kurangwa n’isuku banahana intera ihagije hagati yabo n’ubwo bari mu rugo.
Ikindi avuga ni uko bashishikarije abaturage kujya kwipimisha ku kigo nderabuzima kugira ngo buri wese yirinde kurushaho ariko azi neza uko ubuzima bwe buhagaze.
Agira ati “kubera ubwo bukangurambaga bwimbitse bwakozwe, Ubuyobozi bw’utugari n’imidugudu bagashyiramo imbaraga mu kwigisha abo bashinzwe byatumye igipimo cy’ubwandu mu murenge wa Rilima kigabanuka cyane kuko abari bafite ubwandu bagera kuri 70 mu gihe Guma mu rugo yatangiraga, hamaze gukira benshi ku buryo abatarenze 30 aribo umuntu yavuga ko bari gukurikiranwa mu rugo Kandi nabo turizera ko bazakira vuba.”
Bwana Murwanashyaka Oscal ashimira cyane abaturage b’Umurenge wa Rilima uburyo bitwaye neza muri Guma mu rugo kuko ngo uretse bake cyane, abandi bose bubahirije gahunda zose zashyiriweho zo kwirinda no gukumira icyorezo cya Covid bityo akabasaba kutadohoka bagakomeza kwirinda no mu gihe bazakurwa mu rugo n’inzego zibifitiye ububasha intero ikazaguma kuba imwe yo kwirinda no Gukumira Covid 19, maze imvugo “ntabe ari njye biturukaho” igakomeza kubahirizwa.
Ashimira Kandi Ubuyobozi bw’Akarere ka Bugesera bwababaye hafi igihe cyose bamaze muri Guma mu rugo bakaba baboneye abaturage batishoboye ibyo kurya. Bakaba bizera ko n’abatarabashije kugerwaho nabo bazatekerezwaho uko ubushobozi buzagenda buboneka.
Bamwe mu baturage baganiriye n’ikinyamakuru Igisabo bavuze ko bashimiye cyane Ubuyobozi bwabo bw’Umurenge wa Rilima n’Akarere muri rusange bwabatekerejeho muri ibi bihe bitoroshye bakabazanira ifunguro ryo kubunganira kuko ngo ubushobozi bari bafite bwamaze kubashirana mu byumweru bibiri bamaze badasohoka.
Minani Samuel na Mukandori Jeanette batuye mu Kagari ka Ntarama Umudugudu wa Kagugu bashimira cyane Ubuyobozi bubazaniye ibiribwa muri iki gihe bari muri Guma mu rugo na cyane ko ngo basanzwe batunzwe no guca inshuro mu baturanyi bifite bakaba bari bamaze gushirirwa.
Bavuga ko bakomeje kuguma mu rugo bagendeye ku mabwiriza y’Ubuyobozi abakangurira gukomeza kwirinda no gukumira kurushaho icyorezo cya Covid 19. Kuri Minani Samuel, ariko akavuga ko ari mu banyarwanda batujwe bavuye muri Tanzania akaba ngo kurya n’ubundi bisanzwe bimugora kuko nta sambu agira.
Umuyobozi w’Akarere ka Bugesera Bwana Richard Mutabazi avuga ko bashakiye ibiribwa abaturage bo mu mirenge 5 iri muri Guma mu rugo ariyo, Nyamata, Ruhuha, Shyara, Juru na Rililima kugira ngo imwe mu miryango yaryaga ivuye gukora cyangwa se guca incuro ibashe gusunika iminsi.
Agira Ati “Ni gahunda ya Leta yo gushakira ibiribwa imiryango imwe n’imwe iba yashyizwe mu rugo kubera ahanini ingamba zo gukumira no kurwanya Corona virus. abaturage bari guhabwa ibiryo neza uko bikwiriye bubahiriza n’amabwiriza yo kwirinda Covid birumvikana”
Bwana Richard Mutabazi avuga ko hagendewe ku maraporo y’ababishinzwe, imirenge yashyizwe muri Guma mu rugo mu Bugesera ngo ubwandu bwaragabanutse ku buryo bugaragara bivuye ahanini ku ngamba zafashwe n’ubukangurambaga buhagije bwakorewe abaturage.
Imirenge 5 yashyizwe muri Guma mu rugo mu karere ka Bugesera iri hamwe n’Indi 45 yo mu turere dutandukanye tw’igihugu yagaragawemo ubwandu buri hejuru, ikaba yarayishyizwemo nyuma y’itangazo rya Ministeri y’ubutegetsi bw’igihugu rigendeye ku byemezo n’inama z’abaganga.
Umurenge wa Rilima watanze ibiryo ku bagizweho ingaruka n’iyo Guma mu rugo y’ibyumweru bibiri ukaba ibisanzwe ugizwe n’utugari dutanu n’imidigudu 44, ukagira abaturage ibihumbi 29 bibumbiye mu miryango 6500. Ibiribwa bagenewe n’ubuyobozi bw’Akarere ngo bifashe abaturage ni ibiro 21,396 bingana T21 na kg 396, bigizwe na T 7,724 z’ibishyimbo, T 6,847 za Kawunga ndetse na T 6,825 z’umuceri.
